ضحيّة في جلباب جاني ....بقلم محمد بنصر
العنف ما عندوش مبرّر أما عندو أسبابو و قبل ما نحكمو على " الطفل " اللي ضرب هات نحكمو على ارواحنا اولا .
في البداية نحب نقول للتوانسة اتعلّمو قولوا اللطف. و اعرفوا ان اللي صار على الولد هذا ينجم يصير على اي ولد في تونس .
اولادنا موش ملايكة. موش ماصارش عليك معناها ولدك متربي اكثر مالناس و الا انت تعرف تربّي خير مالناس .. ماصارش عليك على خاطر ربي ساترك و ساتر صغارك . .
قولوا اللطف و هات نحاسبو ارواحنا... و كيف نقول ارواحنا يعني انت و انا. الأب و الأم. المجتمع و التلفزة و الفن و الاعلام
و هات نبداو نسألو...
شكون اللي شرا لولدو تليفون بالملاين باش يتفرّج على كل شي بلاش رقيب ؟
شكون اللي شدّ ولدو و مشا معاه للمدرسة و ضرب المعلّمة على خاطر عيّطت على ولدو ؟
شكون اللي يعطي كل يوم المصروف لولدو و ما يسأـلوش شنوة عملت بالفلوس؟
شكون اللي ضرب مرتو قدام صغارو ؟
شكون اللي صاحت و سبّت راجلها قدام صغارها ؟
شكون اللي وصّل الزطلة لباب الليسي؟
شكون اللي دخّل الغبرة لتونس؟
شكون اللي نادى بالحرية وقت مدير ليسي طلب هندام محترم على التلامذة و قالولو يا رجعي يا متخلّف؟
شكون اللي خلاّ صغارنا يتغرمو بالفري فاير ؟
شكون اللي خلاّ الزبراطة و الغبّارة و الزطّالة كرونيكورات في البلاتوات باش يغرسو سمّهم في دم صغارنا ؟
شكون اللي كل سبت باسم العفن قصدي الفن يستضيف أشباه الفنانين و اشباه المثقفين باش الباباراتزي يحكيلنا عاللي باتت مع فلان في وتيل و عاللي خان مرتو في الخلا و عاللي بمنقالة باعت روحها ؟
شكون اللي باش ترتاح من ولدها حطتّو قدام التلفزة سوايع المهم يسكت ما يقلقهاش على تليفوناتها و عشويتها مع أصحابها ؟
شكون دخّل لديارنا شورّب و اولاد مفيدة العائقين ؟
شكون اللي غنى عالزطلة و الحبس و خلا الغنايات هذي تتعدّى كل يوم في تلافزنا و اذاعاتنا ؟
شكون اللي خلانا نتفرّجو على الدم في مجلس النواب ؟
شكون اللي خلاّ مريم الدباغ و نرمين صفر و عركة الدلاجي مع بية الزردي و عركة زازا مع نجلاء موضوع اعلامي تتخسر عليه الملاين ؟
شكون اللي خلاّ سموم تتعدّى في افلام و مسلسلات و برامج ؟
شكون اللي خلاّ نجلاء تتحسب على الثقافة؟
شكون اللي خلاّ المغتصب بطل وقت يعرّس ببنية اغتصبها و عذّبها و من غدوة يطلّقها ؟
شكون اللي خلاّصغارنا ما يعرفوش عزة الفيلالي و توحيدة بالشيخ و ابو القاسم الشابي و علي بن عياد و يعرفوا سواق مان و كادوريم ؟
شكون اللي خلا صغارنا على عيد الجلاء يقولو عيد جلال و ما يعرفوش تاريخ بلادهم ؟
كان نتصالحو مع ارواحنا و نجابو على الاسئلة هذي بصدق باذن الله نوصلو لحلّ.
الولد هذا اللي قدامنا ضحيّة في جلباب جاني
و حتى لين نوصلو... اتعلموا قولوا اللطف .
محمد بنصر
Aucun commentaire:
Enregistrer un commentaire