بعد الساطور ملابس داخلية في وجه أستاذ
الأوطان لا تُبنى بالملابس الداخلية ...بقلم محمد بنصر...
في انتظار وقفة احتجاجية تحت شعار " سيّب التبّان"...
تلميذ في تونس يرمي ملابس داخلية على أستاذ ...صورة صدمت برشةناس و كل واحد و شنوّة يعلّق بلا غير لا لوّجنا عالأسباب .على خاطر ديما نحبّو نهربو مالحقيقة..حقيقة انو احنا السبب .
تحبو نتصالحو مع أرواحنا و نعرفو علاش وصلنا للدرجة هذي ؟ تحبو ناقفو قدّام مراية و نشوفو الأسباب ؟ و الاّ تحبّو نخبّيو الحقيقة و نهربو منها ؟ حقيقتنا أحنا ....
الحقيقة اللي خلاّت اليوم تلميذ يتجرّأ على أستاذ هي حقيقة الأسباب .
حقيقة المربّي اللي طيّح قدرو و شعّل سيقاروه من عند تلميذو.
حقيقة المربّي اللي مصوحب تلميذتو عالفيس بوك و يجامي على تصاورها و يقوللها محلاك .منوّرة. تبارك الله عليك .تجاوبو هي و تحطّلو قلب.
حقيقة المربي اللي مصوحب تلميذو عالفيس بوك و يقرالو في تدويناتو و كلامو اللي ساعات بكلوتطيح قدر.
حقيقة القيّم اللي تنازل على دورو و شدّ بيروه و ما دارش في المعهد و لاحظ و شاف و نصح و عيّط و عاقب .
حقيقة القيّم اللي ماعادش يقلقو حسّ تلامذة في صفّ و حسّ تلامذة في قسم.ما يقلّقو كان الريزو كيف يقصّ عالانترنات..
حقيقة مدير الليسي اللي خاف على سمعة الليسي و خبّى الخور و المآسي اللي يرا فيها كل يوم ... و يحب المؤسسة متاعو " " مزيّنة "مالبرّة.
حقيقة المدير اللي خلاّ التلامذة يدخلو بالسورفاتمون و البنية اللي تدخل بالسروال المقطّع احتراما للحرية و دوسا على حرمة المدرسة.
حقيقة التوالات المتطرّفة في الليسي و اللي بلاش ضو و بلاش رقيب و بلاش حسيب.
حقيقة البونظة و الإبرة اللي تلقات في التوالات و تكنست كيما تتكنس كل يوم
حقيقةالحرابش اللي تباعت في وسط الليسي و المدير خايف ما يتكلّمش .
حقيقة المربّي اللي تنازل على دورو و ولاّ يشوف في التلميذ فلووووس.
حقيقة القاراجات المحلولة ليل و نهار للسوايع الزايدة.
حقيقة الإضرابات كل يوم و أولادنا في شوارع تستقطب فيهم.
حقيقة الأم اللي ضحكت وقت ولدها قاللها اليوم شخت على " سيدي".
حقيقة البو اللي فرح وقت ولدو خذا حقّو بيدّو و قال ولدي ولاّ راجل .
حقيقة الاعلام اللي عرّا....ما عرّاش الحقيقة... اما عرّا بنات الناس اللي تحسبو على الثقافة.
حقيقة فنّ تورّي نوريّ و بلاش ردع و بلاش رقيب.
حقيقة التلميذ هذا اللي ضحك و هنتل و مرمد أستاذو و رما عليه حوايج دخلانية .... و من غدوة يحاميو عليه. و تدخّل المنظّمات و الجمعيات و الهيئات ... و يدخّل الطبيب اللي يحب يلقى اسباب و علاج و بالك نعملو وقفة احتجاجية شعارها "سيّب التبّان" ......و ندوات و لقاءات و يرجع التلميذ يقرا و يموت الأستاذ بغبينتو .
هات نتصالحو مع ارواحنا و نعرفو اللي احنا السبب
محمد بنصر.
Aucun commentaire:
Enregistrer un commentaire