بمناسبة اليوم العالمي للبوس
نص "البوس" لعلي الدوعاجي:
البوس أنواع... بالمحسوس... بالملموس... بوس شارع... بوس
بين عروسة و عروس... بوس هملة، سيبة... بوس زنوس... بوس عملة... بوس دنّوس... بوس غزالي... بوس غالي ما قيمته فلوس
بالسّر محروس... بوس حنّة... حمّير حرقوس... بوس عروس... موش عاطس عبوس عامل
ناموس... بوس عربي، بعلي، مجرّد بالموس... كامل، لا مقصوص و لا منقوص... بوس عسل،
بيثر، كرموس، دقلة غفوص... فلفل هروس... حار، حلو، مالح، موش مسّوس... بوس غزالي
واللّه بوس مرصوص... بين الذّرعان مكبوس، محبوس... بوس يغوص بين اللّغب و
الزّروص... بوس خفيف... نسمة صيف... لحسة قطّوس... حوتة منكوس و الّا قاروص... هاو
البوس!!! البوس يفرق يا طفلة: فمّا بوس...
بوسة فرصة... تقول رقصة، في الوذن همسة.... و بوسة لسعة لفعة... كيف القرصة تعمل
نغصة... تردّنا قرصة تعمل غصّة... و بوسة فقسة... بلاش متعة... بببّوش بو مصّة،
بصل، فقّوس..ماسط منزوس..قارص بخّوس..منامة عتروس... تكبير نفوس، نحوس، ريح معكوس،
يردّ البعابص روس... الحمد اللّه فمّة بوس ملحون, منثّر... يتقرا في كتب، في
نصوص... سحر، شركة فصوص... طلامس و كلام... للتّفسير حلّ قاموس!
علي الدّوعاجي
Aucun commentaire:
Enregistrer un commentaire