" بلقاسم عقلية" ...بقلم محمد بنصر .
بلقاسم الحقيقي هو المجتمع اللي نعيشو فيه ... هو المجتمع اللي خافت منو المرا اللي هربت لبلقاسم باش ما يضحكش عليها المجتمع المريض . و يحكم عليها بالاعدام على خاطرها ما تخطبتش و ما عرّستش و كيف عرست ما ولدتش..
تونس الكل تحكي على بلقاسم .نساء و رجال. بلقاسم اللي غرّ بمئات النساء اللي ضعفو.
ضعفو قدّام أرواحهم و قدام مجتمع حكم على أولادو و بناتو بالإعدام . و البنّية اللي ما عرّستش تولي مذنبة و لازمها حل؟
و اللي عرّست و ما ولدتش تولي مذنبة و لازمها حلّ...الحل اللي لقاتو برشة نساء في قشّة...القشة اللي يشد فيها الغريق باش ما يغرقش.
لكن المرة هذي القشة هي اللي غرّقت مئات من نساء تونس.
اللوم أولا على المجتمع اللي حكم على أولاد تونس ..بطال يعني مذنب.ما عرستش يعني مذنب.ما جبتش صغار يعني مذنب.ما تهنّيتش مع راجلك يعني مذنبة.مطلّقة يعني مذنبة.
الذنب هذا اللي كل واحد فينا ولاّ عايشو و خايف منو ...و الحل هو بلقاسم.
أما السؤال اللي لازم يتسأل خلي الحقيقة تظهر...قداش من بلقاسم عندنا في تونس؟
قداش من بنية غرّو بيها و قداش من راجل غرّ ببنات الناس .
الفرق بين بلقاسم و البقية هو أن بلقاسم تكشف و آلاف من بلقاسم في تونس مازالو متخبين ورا المرايات و الكرهبة و الكرافات و البارفان و المظاهر والكذب و التصويرة و السهرية و الكلام المعسول و الوردة اللي بلاش ريحة.
قداش من بلقلسم ضحك على بنات الناس في ديار و في كراهب و في خلا و شوارع..قداش من بلقاسم هدّد بنات عطاوه الأمان .قداش من بلقاسم هدد بنات الناس و ابتزّهم بتصاور و حكايات..
قداش من بلقاسم تحرّش بنساء الرجال و بنات الرجال في الزحمة و السوق و الكار و الميترو .
فمة بلقاسم اللي يخدم في معمل و في سبيطار و في مدرسة و في تاكسي . و فمة بلقاسم الاستاذ و بلقاسم الطبيب و بلقاسم المعلم و بلقاسم الحجام و بلقاسم البياض و بلقاسم البناي و بلقاسم الفلاح و بلقاسم الشوفور . و بلقاسم المهندس و بلقاسم البلومبي و بلقاسم الكاوارجي و بلقاسم الفنان...
بلقاسم عقلية .
زعمة قداش من بلقاسم و قداش من ضحية عندنا في تونس. قداش من بنية تضحك عليها و قداش من بنية توعدت و تكذب عليها و قداش من سرّ مخبي بين الضّلوع .و قداش من وجيعة مخبية بين الدّموع .
بلقاسم واحد منا ..أحنا .المجتمع متاعنا اللي فيه تضحك على ضعف الناس .. بلقاسم اغتصب نساء بعد ما اغتصبهم المجتمع اللي حكم على المظاهر .
مجتمع اللي الشرف تربط فيه بالعرس و الهناء تربط فيه بالصغار و الخطيئة تربطت فيه بالطلاق...
مجتمع صار فيه اللي يحب مرتو مسحور و اللي طلّقت موش باهية و الضعيفة موش متهنية و اللي ما عرستش بيها علة و اللي متهنية ساحرة راجلها .مجتمع يحكم على أولادو بالظاهر و ناسي اللي الشرف و الهناء أكبر من تصحاحة في صداق و خطبة و عرس و تصديرة . " و الليلة عرسي" .مجتمع تحرّش ببناتو و هرسلهم على خاطر ما فماش خطيب و ما فماس عرس و ما فماش صغار ..مجتمع هرسل بناتو فكانو لقمة ساهلة عند بلقاسم .
بلقاسم عقلية و ياما كيفو آلاف تمناو يكونو في بلاصتو في بلاصتو في ديار " الخدمة" طبعا موش في الحبس .
اليوم وقيّت باش المجتمع يعتق اولادو اللي ما خدموش و ما عرّسوش و ما ولدوش . ووقيّت باش زادة باش نعرفو اللي القادر الوحيد هو الله .و اللي كل شي في حياتنا آجال. و مكتوب مقدّر.اقبل روحك كيما انت .باش تنجم تاقف قدام الناس الكل ..و ماعادش يتجرّأ عليك حتى "بلقاسم" .
محمد بنصر
Aucun commentaire:
Enregistrer un commentaire